"Шүүхийн оролцоо ба ил тод байдал" сэдвээр хэлэлцүүлэг зохион байгууллаа.

Брюссель дэх Монгол улсын Элчин сайдын яам, Ханнс Зайделийн Сан болон Герман-Монголын Нийгэмлэг хамтран 3 сарын 20-ний өдөр "Шүүхийн оролцоо ба ил тод байдал" сэдвээр шүүх засаглалын байгууллагуудын иргэдтэй харилцах, олон нийтийн хяналтыг нэмэгдүүлэх, шийдвэр гаргах үйл явцыг нээлттэй, ил тод байлгах талаар хэлэлцүүлэг зохион байгууллаа.

Хэлэлцүүлгийг Элчин сайд Л.Болд нээж үг хэлэхдээ энэхүү чухал арга хэмжээг хамтран зохион байгуулсан нийт байгууллага, хүмүүст талархал дэвшүүлэв. Монгол-Германы Нийгэмлэгийн Ерөнхийлөгч Г.Очмаа, Ханнс Зайдел Сангийн Монгол дахь суурин төлөөлөгч Феликс Гленк нар мөн үг хэлж, хэлэцүүлгийн зорилго, ач холбогдлыг өндрөөр үнэлэв.

Энэхүү хэлэлцүүлгийн тусгай зочноор Монгол Улсын Дээд шүүхийн Ерөнхий шүүгч Д.Ганзориг оролцон үг хэлж, Дээд шүүхийн нээлттэй, ил тод байдлын талаар авч хэрэгжүүлж буй бодлого болон ажлаа танилцуулж мөн Европт хийж буй айлчлалынхаа үр дүн, туршлагаасаа хуваалцлаа.

Хэлэлцүүлгийн хөтөлбөрийн хүрээнд Олон Улсын Эрх Зүйн Хөгжлийн Байгууллага (ОУЭЗХБ), Хөтөлбөрийн менежер Норовын Одонтуяа, Монгол Улсын Шүүхийн Сахилгын Хорооны ажлын албаны дарга Доржсүрэнгийн Мөнхзориг мөн Монголын Хэвлэл Мэдээллийн Зөвлөлийн Гүйцэтгэх захирал Гонгорын Гүнжидмаа нар шүүхийн ил тод байдал, иргэдийн оролцоо, шүүгчдийн ёс зүй, хэвлэл мэдээллийн үүрэг зэрэг сэдвүүдээр сонирхолтой илтгэлүүд тавьж, үүнд оролцож буй төр, засаг, иргэний нийгэм, сэтгүүл зүйн салбарын төлөөлөлтэй санал бодлоо илэн далангүй, чөлөөтэй солилцсон үр дүнтэй арга хэмжээ боллоо.