Монгол Улсын Дээд шүүхийн Ерөнхий шүүгч Д.Ганзориг тэргүүтэй төлөөлөгчид Европын холбооны Дээд шүүхийн Ерөнхийлөгч Коен Ленаерт-тай уулзав.

Монгол Улсын Дээд шүүхийн Ерөнхий шүүгч Д.Ганзориг тэргүүтэй төлөөлөгчид Европын холбооны Дээд шүүхийн Ерөнхийлөгч Коен Ленаерт-тай 2025 оны 3 дугаар сарын 19-ний өдөр уулзав. Уулзалтад Элчин сайд Л.Болд, Монгол Улсын Дээд шүүхийн Эрүүгийн хэргийн танхимын тэргүүн Ч.Хосбаяр, УДШ-ийн шүүгч Н.Баярмаа, Б.Амарбаясгалан, Шүүхийн сургалт, судалгаа, мэдээллийн академийн захирал Д.Эрдэнэчимэг, УДШ-ийн Гадаад харилцааны албаны референт З.Гэрэлмаа нар оролцов.

Ерөнхийлөгч Коен Ленаерт тус шүүхийн чиг үүрэг, үйл ажиллагааны талаар танилцуулга хийж, талууд харилцан санал, мэдээлэл солилцохоос гадна манай төлөөлөгчид тус шүүхийн ордон, шүүх хурлын танхимуудтай танилцсан болно. 

Уулзалтын үр дүнд Ерөнхийлөгч Коен Ленаертын зүгээс цаашид шүүх хоорондын хамтын ажиллагааг хөгжүүлэх боломжтойг илэрхийлэв. Мөн Монгол Улсын Дээд шүүхийн дэргэдэх сургалт, судалгаа, мэдээллийн академи болон тус шүүхийн Судалгаа, мэдээллийн газар хооронд шууд харилцаа холбоо тогтоон ажиллахаар тохиров.