Монгол Улсын дээд шүүхийн Ерөнхий шүүгч Д.Ганзориг тэргүүтэй төлөөлөгчид Бельгийн Хаант Улсын Дээд шүүхэд зочлов

Монгол Улсын дээд шүүхийн Ерөнхий шүүгч Д.Ганзориг тэргүүтэй төлөөлөгчид Бельгийн Хаант Улсын Дээд шүүхэд зочилж, тус шүүхийн Ерөнхийлөгч Эрик дө Формануа-тай 2025 оны 3 дугаар сарын 17-ны өдөр уулзав. Уулзалтад Элчин сайд Л.Болд, Монгол Улсын Дээд шүүхийн Эрүүгийн хэргийн танхимын тэргүүн Ч.Хосбаяр, УДШ-ийн шүүгч Д.Цолмон, Б.Батбаатар, М.Пүрэвсүрэн, УДШ-ийн Гадаад харилцааны албаны референт З.Гэрэлмаа нар оролцов.

Уулзалтаар Бельгийн Хаант Улсын Дээд шүүхийн Ерөнхийлөгч Эрик дө Формануа, тус шүүхийн Ерөнхий прокурор Риа Мортиер болон Шүүхийн сургалт, судалгааны төвийн дарга Раф Ван Рансбийк нар тус тусын чиг үүрэг, үйл ажиллагааны талаар танилцуулга хийв. Талууд харилцан санал, мэдээлэл, туршлага солилцохоос гадна манай төлөөлөгчид тус шүүхийн ордон, шүүх хурлын танхимуудтай танилцав.

Уулзалтын үр дүнд талууд шүүхийн сургалт, судалгааны төв хоорондын хамтын ажиллагааг эхлүүлэх, цаашид харилцаа холбоо тогтоон туршлага судлан ажиллахаар тохиров.