Монгол Улсын Дээд шүүхийн төлөөлөгчид Нидерландын Ассерийн хүрээлэнтэй хамтын ажиллагааны санамж бичиг байгуулав
2025 оны 3 дугаар сарын 13-ны өдөр Нидерландын Хаант Улсын Гааг хотноо Монгол Улсын Дээд шүүхийн төлөөлөгчид Бенилюксын орнуудад хийх ажлын айлчлалын хүрээнд Олон улсын болон Европын хуулийн судалгааны төв болох Ассерийн хүрээлэнгийн удирдах зөвлөлийн гишүүн, захирал Др. Каспер Вролийк, академик сургалт хариуцсан захирал Др. Кристоф Поулуссен нартай уулзлаа.
Уулзалтын үеэр Монгол Улсын Дээд Шүүх, Ассерийн хүрээлэнгийн хооронд хамтын ажиллагааны санамж бичигт гарын үсэг зурлаа. Энэхүү Санамж бичгийн хүрээнд Ассерийн хүрээлэн Монгол Улсын шүүхийн байгууллагын эрх зүйн байдлыг бэхжүүлэх, шүүгчдийн чадавхийг нэмэгдүүлэхэд сургалт, судалгаа, арга зүйн дэмжлэг үзүүлж, хамтран ажиллах юм.
Уулзалтад Нидерландын Хаант Улсад хавсран суугаа Элчин сайд Л.Болд, УДШ-ийн шүүгч Д.Цолмон, Б.Батцэрэн, Н.Баярмаа, Шүүхийн сургалт, судалгаа, мэддээллийн академийн захирал Д.Эрдэнэчимэг нар оролцов.