Бүгд Найрамдах Улсаа тунхаглан, анхдугаар Үндсэн хуулиа баталсны 101 жилийн ойн хүндэтгэлийн арга хэмжээ боллоо

Бүгд Найрамдах Улсаа тунхаглан, анхдугаар Үндсэн хуулиа баталсны 101 жилийн ой, Их Эзэн Чингис хааны мэндэлсний 863 жилийн ой - “Монгол бахархлын өдөр”-ийг тэмдэглэх ёслолын арга хэмжээг Брюссель хотноо 2025 оны 11 дүгээр сарын 25-ны өдөр зохион байгууллаа.         

Элчин сайд Л.Болд ёслолын арга хэмжээг нээж хэлсэн үгэндээ Бүгд Найрамдах Улсаа дэлхий дахинаа тунхаглан зарлаж, хуульчлан баталгаажуулсан түүхэн үйл явдлын үүрэг, ач холбогдлыг дурдахын зэрэгцээ Их Эзэн Чингис хааны мэндэлсний 863 жилийн ой - Монголын ард түмний үндэсний эв нэгдлийг илтгэх “Монгол бахархлын өдөр”-ийг тэмдэглэж, энэ онд анх удаа Брюссель хотноо хийсэн “Дэлхийн монголчуудын анхдугаар наадам”, Улаанбаатар хотноо болсон Монгол, Европын холбооны Бизнес, хөрөнгө оруулалтын форум, мөн Монгол Улсын Засгийн газар болон Европын хөрөнгө оруулалтын банк хооронд ногоон хөгжлийг дэмжихэд чиглэсэн 1 тэрбум еврогийн санамж бичиг байгуулсныг онцлов.       

Ёслолын арга хэмжээг хүндэтгэж, Бельгийн Хаант Улсын Гадаад хэрэг, гадаад худалдаа, хөгжлийн хамтын ажиллагааны газрын захирал Ноён Уиллиам Ассельборн, Европын холбооны Гадаад харилцааны албаны Ази, номхон далайн орнуудын газрын захирал Хатагтай Паола Пампалони нар хүрэлцэн ирж, үг хэлэв.      

Энэ үеэр монголын төрийн дууллыг эгшиглүүлж, морин хуур, уртын дууны аялгуунд монголын уран бүтээлчдийн уран зургийн дээжис болон Европын холбооны санхүүжилттэй “Green Labels Mongolia Initiative”-ийн хүрээнд монголын ноос, ноолууран эдлэлийг зочдод сонирхуулж, монголын тухай мэдээлэл бүхий олон улсын Дипломатик Уорлд сэтгүүлийн тусгай дугаарыг сурталчилгааны бусад материалын хамт тарааж, монгол хоолны амталгаа хийв.